我公司個 Receptionist走咗 ~~ 我真係好想開香檳
我咁講雖然好衰, 不過睇埋你就明, 唔係個 Receptionist靚唔靚嘅問題, 而係佢真係八卦到一個點, 唔做差佬卧底浪費咗佢, 香港肯定破少幾單大案, 而且佢八埋八埋用嚟是非當人情, 用A講嘅嘢討好阿B, 用B嘅嘢巴結阿C, 如此類推不斷循環。
你可能會話, 唔同佢講嘢咪得囉！係嘅, 但我一入公司就係呢個 Receptionist, 我哋做 HR 都幾倚賴 Receptionist, 事關每日太多人上嚟見工, 佢嘅其中一個職責就係安排房間, 所以好多時要同佢交接, 而且佢表面上都好識做人, 特別係最初嗰陣, 噓寒問暖, 傾下閒計, 你出入去廁所都要經過 Reception, 好難唔講嘢。
咁點解對佢反感呢? 因為我開始發覺唔對路, 佢多咗同我講阿邊個邊個幾錢人工, 又話邊個邊個喺咩學校畢業, 仲有邊條team個阿head好衰等等, 我唔知佢係點樣同人交換訊息, 但情況就係你同corner位個同事完全唔熟, 都可以好快知道佢結婚未? 住邊? 人工幾多? 仔女幾大? 佢嗰team發生咩事? 真心講, 咁樣其實好恐怖。
當然公司亦有啲老江湖, 特登借佢把口, 將某啲訊息發散俾成層樓百幾人聽, 咁你放心, 呢位 Receptionist一定辦得到, 效率仲好高, 臨尾例牌贈你一句: 唔好話俾人知, 而實情係連茶水阿姐都知。
仲有一樣特點, 就係呢個 Receptionist只會chok人哋嘅嘢, 但從來唔講自己任何嘢, 呢啲咪乞人憎囉, 因為佢根本冇當任何人係朋友, 佢只有一個目的, 就係八盡天下事, 然後食花生, 有時就算你嗰句嘢係講笑, 但經佢演繹完再講俾其他人聽, 真係分分鐘得罪人都唔知發生咩事。
我自問都算識得大體, 但有幾次都差啲想開佢波, 因為啲求職者嚟見完工, 佢總係鍾意問人哋見咩公司? 咩position? 幾錢人工? 幾歲? 直頭係查家宅, 坦白講, 大家做呢行, 究竟你知唔知咩係私隱呀? 如果要咁樣回你一句, 咪盞大家面左左, 所以我盡量沉住氣, 通常人哋嚟見marketing, 我就話佢嚟見cs, degree holder, 就話佢係 diploma 。
有次我 department 請人, 人哋嚟見完工, 佢已經即刻chok料, 叫幾錢人工? 住邊? 有咩經驗? 讀邊間U? 我話唔記得喇, 都擺明hea佢啦, 點知條八婆收唔到料, 仲話返你轉頭, 話有冇搞錯呀, 見完都唔記得。先旨聲明, 我冇階級觀念, 我都係低下層出身, 但嗰刻真係火到想同佢講, 喂, 你咩身份呀? 我都未使同我老闆交代, 我見完個candidate要同個 Receptionist報告? 不如我直情寫份report俾你, 佢second in你入埋嚟見好唔好? 你分下庄閒啦唔該！
後尾先知道, 原來係隔離team某同事想知我哋請咗咩人, 明白晒, 原來佢有任務在身, 想喺我度索料然後又當人情用, 真係DLLM。
我冇爆佢seed, 因為我當時已經知佢辭左職, 話人工少, 多嘢做喎。是L但啦, 同就快離職嘅同事開拖, 係最唔明智, 所以我忍到最後一刻, 心中暗喜日日倒數, 同埋緊記以後同 Receptionist可以客客氣氣以禮相待, 但千祈唔好傾閒計, 熟咗就真係捉蟲。
=========================
#八婆 #八婆同事 #是非當人情 #知唔知咩叫私隱
Search